အမှားတွေကနေ သင်ခန်းစာယူသင့်တဲ့ အကြောင်းရင်းများ

အမှားတွေကနေ သင်ခန်းစာယူသင့်တဲ့ အကြောင်းရင်းများ

အအောင်မြင်ဆုံးပုဂ္ဂိုဟ်တွေဟာ သူတို့ရဲ့အောင်မြင်မှုအကြောင်းတွေကိုပဲ ပြောလေ့ရှိပြီး အဆင်မပြေကျရှုံးခဲ့တာတွေကို ဘာကြောင့်မပြောတာလဲလို့ တွေးမိပါသလား။ ဒါကလည်း အထူးအဆန်းတော့ မဟုတ်ပါဘူး။ ကျွန်တော်တို့အားလုံးက အောင်မြင်မှုကိုပဲ ဦးစားပေးတတ်တာကြောင့် ဖြစ်ပါတယ်။

တကယ်ဆိုရင် လက်ရှိမှာ အောင်မြင်နေတဲ့ ပုဂ္ဂိုဟ်တွေအားလုံးကလည်း အမှန်တွေကိုချည်းပဲ လုပ်ခဲ့တာမဟုတ်သလို အမှားတွေမရှိခဲ့တာလည်း မဟုတ်ပါဘူး။ အရေးကြီးဆုံးအချက်ကတော့ သူတို့အားလုံးဟာ အမှားတွေကနေ ပညာယူတတ်ကြတာပဲ ဖြစ်ပါတယ်။

အဆင်မပြေဖြစ်ခဲ့ရတဲ့ ကြိုးစားမှုတိုင်းဟာ သင့်အတွက် အစားထိုးမရနိုင်တဲ့ အတွေ့အကြုံတွေ ပေးစွမ်းနိုင်တာကြောင့် အမှားတွေဟာ အောင်မြင်မှုထက် အဖိုးတန်တယ်လို့ ဆိုနိုင်ပါတယ်။ ဒါ့ကြောင့် အမှားတွေကနေ ပညာယူသင့်တဲ့ အကြောင်းရင်းတချို့ကို ဖော်ပြပေးလိုက်ပါတယ်။

၁။ အတွေ့အကြံုတွေ ပေးနိုင်တယ်
အမှားတွေဟာ နောင်အနာဂတ်မှာ အကျင့်ကောင်းတွေ ဖြစ်လာစေဖို့ အထောက်အကူပေးနိုင်ပါတယ်။ လုပ်ငန်းခွင်ထဲမှာ အမှားတစ်ခါလုပ်ဖူးခဲ့ရင် နောက်တစ်ခါ ထပ်မမှားရအောင် ဂရုစိုက်တတ်လာပါလိမ့်မယ်။ တစ်ခါတစ်လေမှာ မိသားစုနဲ့ မိတ်ဆွေသူငယ်ချင်းတွေက ဘယ်လောက်ပြောပြော နားမဝင်တတ်တဲ့ အရေးကိစ္စတွေဟာ ကိုယ်တိုင်အမှားလုပ်မိပြီး တွေ့ကြံုဖူးသွားတဲ့အခါမှ နောက်မဖြစ်အောင် ဆင်ခြင်နိုင်လာတာ ဖြစ်ပါတယ်။

၂။ ထူးခြားတဲ့အတွေးအခေါ်တွေ ရရှိလာစေတယ်
အမှားလုပ်မိတဲ့အခါမှာ လက်ရှိပြဿနာကို ဖြေရှင်းဖို့ မတူကွဲပြားတဲ့ နည်းလမ်းတွေကို ရှာဖွေကြရပါတယ်။ အမှားတွေဟာ ဖြေရှင်းနည်းအသစ်တွေကို ပေါ်ထွက်လာအောင် လှုံ့ဆော်ပေးနိုင်ပါတယ်။ သင့်ရဲ့ မူလစိတ်ကူးက အလုပ်မဖြစ်တဲ့အခါမှာ အခြားနည်းလမ်းတစ်ခုကို စဉ်းစားနိုင်လာစေပါတယ်။

၃။ အကျင့်စရိုက်ကောင်းတွေကို ဖြစ်ထွန်းစေတယ်
အမှားတွေများလွန်းလာတဲ့အခါမှာ လူအများစုက စိတ်ဓာတ်ကျဆင်းသွားတတ်ကြပါတယ်။ ကျရှုံးမှုတွေ များလာတဲ့အခါမှာ စိတ်ကူးအိပ်မက်တွေကို စွန့်လွှတ်လိုက်ဖို့ စိတ်ကူးတတ်ကြပါတယ်။ ဒါပေမယ့် အမှားတွေကနေ သင်ခန်းစာယူနိုင်ပြီဆိုတာနဲ့ မိမိကိုယ်ကို ယုံကြည်မှုတွေ ပြန်လည်ဖြစ်တည်လာပြီး ပိုပြီးအောင်မြင်တဲ့ လူတစ်ယောက်ရဲ့ အကျင့်စရိုက်တွေကို ပိုင်ဆိုင်လာစေနိုင်ပါတယ်။

၄။ တိုးတက်မှုကို အထောက်အကူပေးတယ်
တစ်ခါဆိုရင် အမှား နှစ်ခါဆိုရင် အပြစ် ဆိုတဲ့ စကားကို ကြားဖူးကြမှာပါ။ လူတိုင်း အနည်းဆုံး တစ်ကြိမ်တော့ ကျရှုံးတတ်ကြပါတယ်။ အောင်မြင်မှုတစ်ခုကို တစ်ခါတည်းနဲ့ ရယူနိုင်တယ်ဆိုတာလည်း အရမ်းကို ရှားပါတယ်။ ဒါပေမယ့် ကျရှုံးမှုတွေ၊ အမှားတွေကနေ သင်ခန်းစားမယူပဲ အရင်အတိုင်းပဲ ဆက်လုပ်နေမယ်ဆိုရင် ရလဒ်ကလည်း အရင်အတိုင်းပဲ ဖြစ်နေမှာပါ။ သင့်အနေနဲ့ တစ်ခါကျရှုံးဖူးရင် အခြားပိုကောင်းတဲ့ နည်းလမ်းတစ်ခုကို ရှာဖွေရမှာဖြစ်ပါတယ်။

၅။ အားနည်းချက်တွေကို ဖော်ထုတ်ပေးတယ်
သင်ဟာ မလုပ်ချင်တာတွေကို ဖယ်ထားပြီး လုပ်ချင်တာတွေကိုပဲ ရွေးလုပ်တတ်တဲ့လူတစ်ယောက်လား။ သင့်မလုပ်ချင်တာတွေကို ကိုယ်စားလုပ်ပေးမယ့်သူရှိရင်တော့ ပြဿနာမရှိပါဘူး။ ဒါပေမယ့် သင်ကိုယ်တိုင်လုပ်မှ ဖြစ်မယ့်ကိစ္စတွေဆိုရင်တော့ အဆင်ပြေမှာမဟုတ်ပါဘူး။ အချိန်ရွှေ့ဆိုင်းတာဟာ လူအများစုလုပ်တတ်တဲ့ အမှားတစ်ခုဖြစ်ပါတယ်။ ကျွန်တော်တို့အားလုံးဟာ အလွယ်တကူလုပ်နိုင်တာကိုပဲ အာရုံစိုက်ချင်ကြပြီး ခက်ခဲပင်ပန်းမယ့်အရာတွေကို လုပ်စရာရှိတာမလုပ်ပဲ အချိန်ရွှေ့ဆိုင်းတတ်ကြပါတယ်။

အစကတည်း မှန်တဲ့လူဆိုတာ မရှိသလောက် ရှားပါတယ်။ သင့်အနေနဲ့ ကျရှုံးသွားလည်း စိတ်ဓာတ်မကျပဲ ပြန်ထနိုင်ရမှာ ဖြစ်ပါတယ်။ အမှားတွေကနေ သင်ခန်းစာယူနိုင်မှာ အောင်မြင်မှုကို ရရှိမှာဖြစ်ပါတယ်။

မိန်းကလေးတိုင်း တောင့်တပြီး ယောင်္ကျားလေးတိုင်း အားကျစေမည့်
Gentleman Magazine

%d bloggers like this: