လိင်အင်္ဂါစွပ်ကွင်းတွေအကြောင်းသိကောင်းစရာများ

လိင်အင်္ဂါစွပ်ကွင်းတွေဟာ လိင်ဆက်ဆံချိန်မှာ အသုံးပြုရတဲ့ Sex Toy တစ်ခု ဖြစ်ပါတယ်။ လိင်တံရဲ့ အရင်းမှာ စွပ်ရတာမျိုးရှိသလို၊ ဝှေးစေ့နှစ်လုံးကိုပါ ကျော်ပြီး ဆီးခုံရင်းထိ စွပ်တာမျိုးတွေလည်း ရှိပါတယ်။

လိင်တံစွပ်ကွင်းတွေကို အသုံးပြုရတဲ့ ရည်ရွယ်ချက်ကတော့ လိင်ဆက်ဆံချိန်မှာ အချိန်ကြာကြာပိုမိုစွမ်းဆောင်နိုင်ဖို့၊ သာယာမှုကို ပိုမိုခံစားရဖို့ပဲ ဖြစ်ပါတယ်။

မှန်ကန်တဲ့နည်းလမ်းနဲ့ အသုံးပြုမယ်ဆိုရင် လိင်တံစွပ်ကွင်းတွေဟာ ဘေးကင်းတဲ့ပစ္စည်းတွေလို့ ဆိုနိုင်ပါတယ်။ ဒီစွပ်ကွင်းရဲ့ အားသာချက်ကတော့ လိင်တံမာတောင့်စေဖို့ စီးဝင်နေတဲ့ သွေးတွေကို အထဲပြန်မဝင်သွားစေဖို့ လိင်တံတွင်း သွေးကြောတွေထဲမှာ ပိတ်လှောင်ဖို့ ကူညီပေးတာပဲဖြစ်ပါတယ်။ ဒီလိုသွေးတွေက အထဲပြန်မဝင်သွားတဲ့အခါ လိင်တံတစ်ရှူးတွေက ပိုမာပြီး ကြီးလာသလို လိင်တံထောင်မတ်ချိန် လည်း ပိုမိုကြာမြင့်စေတယ်။ ဒါ့အပြင် သုက်လွှတ်မမြန်အောင် ထိန်းထားပေးနိုင်ပါတယ်။

လိင်တံစွပ်ကွင်း သုံးရင် ဘယ်လိုအကျိုးကျေးဇူးတွေ ရနိုင်မလဲ?

၁။ လိင်တံထောင်မတ်မှုကို ထိန်းသိမ်းထားနိုင်တယ်

လိင်စိတ် ဖြစ်နေတဲ့အချိန် လိင်အင်္ဂါတစ်ရှုးတွေထဲကို သွေးတွေအများကြီးစီးဝင်လာတာကြောင့် လိင်အင်္ဂါက ထောင်မတ်ကြီးထွားလာခြင်းဖြစ်ပါတယ်။ လိင်စိတ်ကျသွားတဲ့အခါ ခန္ဓာကိုယ်ထဲကို သွေးတွေပြန်စီးသွားတာကြောင့် ပျော့သွားပါတယ်။ ဒီလို လိင်အင်္ဂါအတွင်းက သွေးတွေ မြန်မြန်နဲ့ပြန်မစီးသွားအောင် လိင်အင်္ဂါစွပ်ကွင်းတွေက ညှစ်ထားပေးတဲ့ သဘောဖြစ်ပါတယ်။ ဒါ့ကြောင့် လိင်တံထောင်မတ်ချိန်ကို ပိုမိုကြာမြင့်စေနိုင်ပြီး အချိန်ကြာကြာစွမ်းဆောင်နိုင်စေမှာ ဖြစ်ပါတယ်။

၂။ သင့်ကို ယုံကြည်မှုရှိစေတယ်

လိင်အင်္ဂါစွပ်ကွင်းတွေက လိင်တံထောင်မတ်မှုနဲ့ပတ်သက်ပြီး သင့်ရဲ့ စိတ်ပူပန်မှုတွေကို လျော့နည်းသွားစေနိုင်တာကြောင့် အိပ်ရာထဲမှာ ယုံကြည်မှုအပြည့်နဲ့ စွမ်းဆောင်နိုင်မှာ ဖြစ်ပါတယ်။ သင့်အနေနဲ့ အချိန်တိုအတွင်း လိင်တံပျော့မသွားဘူးလို့ စိတ်ချနေနိုင်တာကြောင့်ပါ။

၃။ သုက်လွှတ်မမြန်အောင် ထိန်းထားပေးနိုင်တယ်

လိင်အင်္ဂါစွပ်ကွင်းတွေဟာ လိင်တံနဲ့ ဥတွေရဲ့ အောက်ခြေအရင်းနေရာတဝိုက်ကို ညှစ်ထားပေးတာကြောင့် သုက်လွှတ်မမြန်အောင်လည်း ထိန်းထားပေးနိုင်တယ်လို့ ဆိုကြပါတယ်။ ဒါ့အပြင် သုက်လွှတ်ချိန်မှာလည်း ပုံမှန်ထက်ပိုပြီး ပြင်းထန်သာယာတဲ့ ခံစားမှုကို ခံစားရနိုင်စေပါတယ်။

၄။ လိင်တံကို ပိုကြီးလာစေတယ်

လိင်အင်္ဂါစွပ်ကွင်းတွေဟာ လိင်စိတ်နိုးထချိန်မှာ စီးဝင်လာတဲ့ သွေးတွေကို အလွယ်တကူပြန်လည်စီးဆင်းမသွားအောင် ညှစ်ထားပေးတာကြောင့် လိင်တံတစ်ရှုးတွေက ပိုမိုကြီးထွားလာပါတယ်။ ဒီလိုဖြစ်တာက သင့်ရဲ့ လိင်တံကို ပိုမိုကြီးမားစေသယောင် ထင်ရစေပါတယ်။

၅။ လိင်ဆက်ဆံဖော်ကို ပိုမိုကျေနပ်စေနိုင်တယ်

လိင်တံ ကြာကြာထောင်မတ်နိုင်တာ၊ သုက်လွှတ်မမြန်တာတွေက သင့်ပါတနာကို ပိုမိုကျေနပ်မှုပေးနိုင်မယ်ဆိုတာ သေချာပါတယ်။

လိင်တံစွပ်ကွင်းကို ဘယ်လိုအသုံးပြုကြမလဲ။

လိင်တံပျော့နေတဲ့အချိန်မှာ ခေါင်းကနေ တစ်ဆင့် ဖြည်းဖြည်းချင်း အနောက်ကို ဆွဲသွင်းရပါမယ်။ လိင်တံကိုပဲ စွပ်မယ်ဆိုရင်တော့ ပြဿနာမဟုတ်ပေမဲ့ ဝှေးစေ့တွေကိုပါ ထည့်စွပ်မယ်ဆိုရင်တော့ အရင်ဆုံး ဝှေးစေ့တစ်လုံးကို ကွင်းထဲထည့်ပြီးမှ နောက်တစ်လုံးကို ထည့်ရမှာပါ။ ပြီးသွားတော့မှ ပျော့နေတဲ့ လိင်တံကို အနည်းငယ်ကွေးညွတ်ပြီးမှ ဖြည်းဖြည်းချင်း ကွင်းထဲကို ထည့်ပါ။ အကုန်လုံး ကွင်းထဲဝင်သွားပြီဆိုရင် ကပ္ပါယ်အိတ်အနောက်နဲ့ လိင်တံအရင်းထိပ်မှာ ကွင်းကို သေချာစွာ တပ်ဆင်ရပါမယ်။

ချောင်ချောင်ချိချိနဲ့ စွပ်လို့လွယ်ကူအောင် ချောဆီနည်းနည်းစွတ်ပြီးမှ ကွင်းထဲသွင်းတာ ပိုကောင်းပါတယ်။ စွပ်လိုက်တဲ့အခါ ကိုယ့်ရဲ့ ပစ္စည်းနဲ့ အံဝင်ခွင်ကျဖြစ်နေဖို့ ကွင်းရဲ့ အရွယ်အစားက တော်တော်လေး အရေးပါပါတယ်။ အကယ်လို့ ကိုယ်က ကွန်ဒုံးစွပ်ပြီး လိင်ဆက်ဆံမယ်ဆိုရင် ကွင်းမစွပ်ခင် အရင်ဆုံး ကွန်ဒုံးကို စွပ်ထားဖို့တော့ လိုပါတယ်။ ကွန်ဒုံးနဲ့ လိင်တံစွပ်ကွင်း ငြိမနေစေဖို့ သတိထားပေးပါ။ အရေးကြီးတာက လိင်တံစွပ်ကွင်းကို တစ်ခါအသုံးပြုရင် နာရီဝက်ထက် ပိုမကြာဖို့ပါပဲ။ အစပိုင်း ကိုယ်က သုံးကျင့်မရှိသေးရင် နှိုးစက်နဲ့ အချိန်လုပ်ပေးထားတာ ပိုကောင်းပါတယ်။ လိင်တံစွပ်ကွင်း စွပ်လျက်နဲ့ အိပ်ပျော်မသွားစေဖို့လည်း ကူညီပေးရာရောက်ပါတယ်။

လိင်တံစွပ်ကွင်းတွေက စိတ်ချရရဲ့လား??

များသောအားဖြင့် စိတ်ချရပါတယ်။ ဒါပေမယ့် အခုဖော်ပြမယ့် အချက်တွေကိုတော့ လိုက်နာဖို့ လိုပါတယ်။

၁။ ကိုက်ညီတဲ့ အရွယ်အစားကို ရွေးချယ်ပါကွန်ဒုံးဝယ်သလိုပါပဲ။

လိင်တံစွပ်ကွင်းကို ဝယ်တော့မယ်ဆိုရင် ကိုယ့်ပစ္စည်းနဲ့ ကိုက်ညီမယ့် အရွယ်အစားကို ရွေးဝယ်ဖို့ အရေးကြီးပါတယ်။ ကိုယ့်အရွယ်အစားကို တိုင်းဖို့အတွက် လိင်တံပျော့နေချိန်မှာ အရင်းပတ်ပတ်လည်ကို ကြိုးအမျှင်သေးသေးလေးနဲ့ စွပ်ပြီး အမှတ်မှတ်ထားလို့ ရပါတယ်။ ဒါမှမဟုတ် အလွယ်တကူ ချုံ့၊ ချဲ့လို့ရတဲ့ အပျော့စားကွင်းတွေ ရွေးလို့လည်း အဆင်ပြေပါတယ်။

၂။ မိနစ် ၂၀ ဝတ်ပြီး ချွတ်ပါ

ဒီအချက်က အရေးကြီးပါတယ်။ လိင်အင်္ဂါစွပ်ကွင်းတွေကို အချိန်ကြာကြာဝတ်ထားမယ်ဆိုရင် လိင်တံကို ထိခိုက်မှုတွေ ဖြစ်စေနိုင်ပါတယ်။ ထုံကျင်တာ၊ နာကျင်တာ၊ အရေပြားအရောင်ပြောင်းတာတွေ ဖြစ်လာရင် ချက်ချင်းချွတ်ဖို့ လိုပါတယ်။ လိင်အင်္ဂါစွပ်ကွင်းသုံးမယ်ဆိုရင် မိနစ် ၂၀ – နာရီဝက်ထက် ပိုပြီးဝတ်မထားမိအောင် ဂရုစိုက်ပါ။

၃။ ဆီးခုံမွှေးကို ရှင်းထားပါ

လိင်အင်္ဂါစွပ်ကွင်းသုံးမယ်ဆိုရင် ဆီးခုံမွှေးက ပြဿနာဖြစ်လာနိုင်ပါတယ်။ စွပ်ကွင်းကို ချွတ်ချိန်မှာ ဆီးခုံမွှေးတွေ ညပ်ပြီး နာကျင်မှုမဖြစ်ရအောင် ဂရုစိုက်ဖို့ လိုပါတယ်။

မိန်းကလေးတိုင်းတောင့်တပြီး ယောင်္ကျားလေးတိုင်း အားကျစေဖို့

Gentleman Magazine