စိတ်ခံစားလွယ်သူတွေနဲ့ ဆက်ဆံသည့်အခါ ဆောင်ရန် ရှောင်ရန်များ

စိတ်ခံစားလွယ်သူတွေနဲ့ ဆက်ဆံရတာက လွယ်မလိုနဲ့ ခက်ခဲတဲ့ကိစ္စတစ်ခုဖြစ်ပါတယ်။ သူတို့နဲ့ ဆက်ဆံတဲ့အခါ သတိထားရမယ့်အချက်လေးတွေ ရှိပါတယ်။

ရှောင်ရန် – သူတို့ကို စိတ်ခံစားလွယ်တယ်လို့ မပြောပါနဲ့။

သူတို့ကိုယ်သူတို့လည်း စိတ်ခံစားလွယ်သူတွေမှန်း သိပြီးသားပါ။ သူတို့က အသက် ၃ နှစ်လောက်မှာ စားမယ့်မုန့်လက်ထဲက ပြုတ်ကျသွားကတည်းက လိုတာထက်ပိုပြီး ခံစားတတ်သူဖြစ်ပါတယ်။ ဒါ့ကြောင့် စိတ်ခံစားမှုများတယ်၊ စိတ်ခံစားလွယ်တယ်လို့ ပြောတာက သူတို့ကို ဘာမှပြောင်းလဲသွားစေမှာမဟုတ်ပါဘူး။

ဆောင်ရန် – သူတို့ ဘယ်လိုခံစားနေရလဲ မေးပါ။

သူတို့ ခံစားနေရတဲ့နောက်ကွယ်မှာ အကြောင်းရင်းရှိပါတယ်။ သူတို့ ဘာကိုခံစားနေရလဲဆိုတာ သိအောင် ကြိုးစားပါ။ သင်က ယုံကြည်ရသူတစ်ယောက်ဆိုရင် သူတို့ ရင်ဖွင့်လာပါလိမ့်မယ်။ ဒါက သူတို့ကို ပိုပြီးတည်ငြိမ်သွားအောင် ကူညီပေးနိုင်ပါတယ်။

ရှောင်ရန် – သင် တကယ်မသိပဲ သူတို့ဘယ်လိုခံစားနေရလဲသိတယ်လို့ မပြောပါနဲ့။

စိတ်ခံစားလွယ်သူတွေက ဘာကြောင့် ဘယ်လိုခံစားနေရလဲဆိုတာ သင် မသိတာက ပြဿနာမဟုတ်ပါဘူး။ လူတစ်ကိုယ်စိတ်တစ်မျိုးဖြစ်တာကြောင့် တစ်ယောက်နဲ့ တစ်ယောက် ခံစားမှုချင်းလည်း မတူနိုင်ပါဘူး။ ဒါပေမယ့် သူတို့ ခံစားချက်ကို သင်သေချာမသိပဲ သိတယ်လို့ ပြောတာက သူတို့ ခံစားချက်ကို အလေးမထားသလို ဖြစ်သွားနိုင်ပါတယ်။

ဆောင်ရန် – သူတို့ ဘယ်လိုခံစားနေရလဲ နားလည်ချင်ကြောင်းပြောပါ။

သူတို့ ခံစားနေရတဲ့အကြောင်းအရာကို ပြောပြရင်တောင်မှ သင့်အနေနဲ့ လုံးဝေ့ပတ်စေ့နားလည်ဖို့ မလွယ်ပါဘူး။ ဒါပေမယ့် သင့်အနေနဲ့ သူတို့အပေါ် စာနာကြောင်းနဲ့ သူတို့ဖက်က ရပ်တည်ပေးကြောင်း ဖော်ပြနိုင်ပြီး သူတို့ကိုလည်း ပိုပြီး စိတ်သက်သာရာရစေနိုင်ပါတယ်။

ရှောင်ရန် – ဒေါသမထွက်ပါနဲ့။

စိတ်ခံစားမှုလွယ်သူတွေက တစ်ခါတစ်လေမှာ ဘာမဟုတ်တဲ့အကြောင်းအရာလေးပေါ်မှာလည်း ခံစားနေတတ်ပါတယ်။ ဒါက သင့်ကို စိတ်ပျက်ဒေါသထွက်စရာ ဖြစ်စေနိုင်ပါတယ်။ ဒါပေမယ့် သိသာအောင် ဒေါသထွက်ပြလိုက်တာက သူတို့ကို ပိုပြီးခံစားရစေပါတယ်။

ဆောင်ရန် – အားလုံးအဆင်ပြေသွားမှာပါလို့ ပြောပေးပါ

ဒီစကားလေးက ရိုးရှင်းပါတယ်။ ဒါပေမယ့် စိတ်ခံစားမှုလွယ်သူတွေကို အားပေးနှစ်သိမ့်ရာမှာ ထိရောက်တဲ့ စကားဖြစ်ပါတယ်။

ရှောင်ရန် – စိတ်ခံစားမှုတွေကို ယုတ္တိကျကျ ဖြေရှင်းပြဖို့ မကြိုးစားပါနဲ့။

စိတ်ခံစားမှုလွယ်သူတွေဟာ တစ်ခါတစ်လေမှာ ယုတ္တိမရှိတဲ့ ခံစားမှုတွေရှိနေတတ်ပါတယ်။ သင့်အနေနဲ့ သူတို့ ခံစားနေရတဲ့အကြောင်းအရာပေါ်မှာ ယုတ္တိကျတဲ့ ဖြေရှင်းချက်တစ်ခုခုရှိနေနိုင်ပါတယ်။ ဒါပေမယ့် သူတို့ ခံစားမှုကို ဘယ်လိုယုတ္တိကျတဲ့ ဖြေရှင်းချက်ကမှ ဖြေလျှော့ပေးနိုင်မှာ မဟုတ်ပါဘူး။ ပိုတောင်ဆိုးသွားစေနိုင်ပါတယ်။

ဆောင်ရန် – သင့်အနေနဲ့ခံစားမှုအနည်းငယ် ထုတ်ပြပါ။

ဘယ်သူမဆို ခံစားတတ်တဲ့ နှလုံးသားရှိပါတယ်။ စိတ်ခံစားမှုလွယ်သူတွေကိုလည်း သင်လည်း ခံစားတတ်ကြောင်း သိအောင်ထုတ်ပြပါ။ သူတို့လို ခံစားချက်တွေအများကြီး မရှိပေမယ့် ခံစားတတ်ကြောင်း ထုတ်ပြမယ်ဆိုရင် စိတ်သက်သာရာရစေနိုင်မှာဖြစ်ပါတယ်။

ရှောင်ရန် – သူတို့ကို မနှိမ်ပါနဲ့။

တစ်စုံတစ်ယောက်က စိတ်ခံစားမှုတွေ လွန်ကဲနေတာက ကလေးဆန်နေတာမဟုတ်ပါဘူး။ ဒါကို နှိမ့်ချပြောဆိုနေမယ်ဆိုရင် သူတို့ကို ပိုပြီး စိတ်ပျက်ဝမ်းနည်းစေနိုင်ပါတယ်။ ဒါ့ကြောင့် စိတ်ခံစားလွယ်သူတွေကို မနှိမ်ချပဲ လေးစားသမှုနဲ့ ဆက်ဆံပေးတာက သူတို့ကို ကူညီရာရောက်ပါတယ်။

မိန်းကလေးတိုင်း တောင့်တပြီး ယောက်ျားလေးတိုင်း အားကျစေဖို့

Gentleman magazine